ಮರಗಳ ಸಮರುವಿಕೆ, ಬೀದಿ ದೀಪ ನಿರ್ವಹಣೆಗೆ ಶಕ್ತಿಮಾನ್ ಯಂತ್ರ: ಮಹಾನಗರ ಪಾಲಿಕೆಯಲ್ಲಿ ಪ್ರಾತ್ಯಕ್ಷಿಕೆ

ಮರಗಳ ಸಮರುವಿಕೆ, ಬೀದಿ ದೀಪ ನಿರ್ವಹಣೆಗೆ ಶಕ್ತಿಮಾನ್ ಯಂತ್ರ: ಮಹಾನಗರ ಪಾಲಿಕೆಯಲ್ಲಿ ಪ್ರಾತ್ಯಕ್ಷಿಕೆ

ಬೆಳಗಾವಿ ಆಗಸ್ಟ್ 24: ನಗರ ಪ್ರದೇಶಗಳಲ್ಲಿ ಮರಗಳ ಸಮರುವಿಕೆ, ಕೊಯ್ಲು, ಸಿಂಪರಣೆ ಹಾಗೂ ಬೀದಿ ದೀಪಗಳ ನಿರ್ವಹಣೆ ಸೇರಿದಂತೆ ವಿವಿಧ ಎತ್ತರದ ಕಾಮಗಾರಿಗಳನ್ನು ಸುಲಭವಾಗಿ, ಸುರಕ್ಷಿತವಾಗಿ ಮತ್ತು ವೇಗವಾಗಿ ಕೈಗೊಳ್ಳಲು ಸಹಕಾರಿಯಾಗುವ ಶಕ್ತಿಮಾನ್ STMP-26 ಅಲ್ಟ್ರಾ ಸ್ವಯಂ ಚಾಲಿತ ವೇದಿಕೆ ಯಂತ್ರದ ಪ್ರಾತ್ಯಕ್ಷಿಕೆಯನ್ನು ಬೆಳಗಾವಿ ಮಹಾನಗರ ಪಾಲಿಕೆ ಆವರಣದಲ್ಲಿ ನಡೆಸಲಾಯಿತು.

ಮಹಾನಗರ ಪಾಲಿಕೆಯ ಮಹಾಪೌರರಾದ ಪ್ರೀತಿ ಕಾಮಕರ ಹಾಗೂ ಉಪ ಮಹಾಪೌರರಾದ ಹನುಮಂತ ಕೊಂಗಾಲಿ ನಗರ ಸೇವಕರಾದ ಸಂತೋಷ ಪೇಡನೆಕರ್ ನಗರ ಸೇವಕರು ಅವರು ಯಂತ್ರದ ಕಾರ್ಯವೈಖರಿಯನ್ನು ವೀಕ್ಷಿಸಿ, ಅದರ ವಿವಿಧ ಉಪಯೋಗಗಳ ಕುರಿತು ಮಾಹಿತಿ ಪಡೆದುಕೊಂಡರು. ಈ ಸಂದರ್ಭದಲ್ಲಿ ಶಕ್ತಿಮಾನ್ ಕಂಪನಿಯ ಇಂಜಿನಿಯರ್‌ಗಳು ಹಾಗೂ ಸಿಬ್ಬಂದಿ ಯಂತ್ರದ ಕಾರ್ಯನಿರ್ವಹಣೆ ಮತ್ತು ತಾಂತ್ರಿಕ ವೈಶಿಷ್ಟ್ಯಗಳನ್ನು ವಿವರಿಸಿದರು. ಮಹಾನಗರ ಪಾಲಿಕೆಯ ಆಡಳಿತ ವರ್ಗದ ಅಧಿಕಾರಿಗಳು ಹಾಗೂ ಸಿಬ್ಬಂದಿ ಉಪಸ್ಥಿತರಿದ್ದರು.

ಶಕ್ತಿಮಾನ್ ಸಂಸ್ಥೆಯ ಈ ಆಧುನಿಕ ಯಂತ್ರವನ್ನು ಮರಗಳ ಸಮರುವಿಕೆ, ಕೊಯ್ಲು, ಮರಗಳ ಮೇಲಾವರಣ ನಿರ್ವಹಣೆ, ಸಿಂಪರಣೆ, ಬೀದಿ ದೀಪಗಳ ನಿರ್ವಹಣೆ, ಬಿಳಿ ತೊಳೆಯುವುದು, ಬಣ್ಣ ಬಳಿಯುವುದು, ನಗರ ಸ್ವಚ್ಛತೆ, ಕೈಗಾರಿಕಾ ಮತ್ತು ನಾಗರಿಕ ನಿರ್ವಹಣೆ, ವಿದ್ಯುತ್ ನಿರ್ವಹಣೆ ಹಾಗೂ ಲಂಬ ತೋಟಗಾರಿಕೆ ಸೇರಿದಂತೆ ವಿವಿಧ ಕಾರ್ಯಗಳಿಗೆ ಬಳಸಬಹುದಾಗಿದೆ.

ಸ್ವಯಂ ಚಾಲಿತ ಹಾಗೂ ಹೈಡ್ರಾಲಿಕ್ ವ್ಯವಸ್ಥೆ ಹೊಂದಿರುವ STMP-26 ಅಲ್ಟ್ರಾ ಯಂತ್ರವು ಸುಮಾರು 8 ಮೀಟರ್‌ಗಳಷ್ಟು ಎತ್ತರದವರೆಗೆ ಕಾರ್ಯನಿರ್ವಹಿಸುವ ಸಾಮರ್ಥ್ಯ ಹೊಂದಿದೆ. ಒಬ್ಬ ಆಪರೇಟರ್ ಯಂತ್ರವನ್ನು ನಿರ್ವಹಿಸಬಹುದಾಗಿದ್ದು, ಮರಗಳ ಮೇಲ್ಭಾಗಕ್ಕೆ ಸುಲಭವಾಗಿ ತಲುಪಿ ಸಮರುವಿಕೆ ಹಾಗೂ ಸಿಂಪರಣೆ ಕಾರ್ಯ ಕೈಗೊಳ್ಳಲು ಅನುಕೂಲವಾಗುತ್ತದೆ.

ಹಣ್ಣುಗಳ ಕೊಯ್ಲಿನ ಸಂದರ್ಭದಲ್ಲಿಯೂ ಯಂತ್ರದ ಪ್ಲಾಟ್‌ಫಾರ್ಮ್‌ ಬಳಸಿ ಹಣ್ಣುಗಳನ್ನು ಕಿತ್ತು ಬಕೆಟ್‌ನಲ್ಲಿ ಸಂಗ್ರಹಿಸಬಹುದಾಗಿದೆ. ಇದರಿಂದ ಹಣ್ಣುಗಳು ನೆಲಕ್ಕೆ ಬಿದ್ದು ಹಾನಿಯಾಗುವುದನ್ನು ತಪ್ಪಿಸುವುದರ ಜೊತೆಗೆ, ಸಾಂಪ್ರದಾಯಿಕವಾಗಿ ಮರ ಏರಿ ಮಾಡುವ ಕಾರ್ಯಕ್ಕಿಂತ ಹೆಚ್ಚು ಸುರಕ್ಷಿತವಾಗಿ ಹಾಗೂ ಪರಿಣಾಮಕಾರಿಯಾಗಿ ಕೆಲಸ ನಿರ್ವಹಿಸಲು ಸಾಧ್ಯವಾಗಲಿದೆ.

ಯಂತ್ರವು ಸುಮಾರು 1,900 ಕೆ.ಜಿ. ತೂಕ, 8,000 ಮಿ.ಮೀ. ಕೆಲಸದ ಎತ್ತರ ಹಾಗೂ 145 ಕೆ.ಜಿ. ಪ್ಲಾಟ್‌ಫಾರ್ಮ್ ಸಾಮರ್ಥ್ಯ ಹೊಂದಿದೆ. 22 HP ವಾಟರ್‌ ಕೂಲ್ಡ್ ಡೀಸೆಲ್ ಎಂಜಿನ್, ಹೈಡ್ರಾಲಿಕ್ ಲಾಪಿಂಗ್ ಉಪಕರಣ ಮತ್ತು ಹೈಡ್ರಾಲಿಕ್ ಚೈನ್ ಸಾ ಉಪಕರಣಗಳನ್ನು ಹೊಂದಿದ್ದು, ಹೆಚ್ಚುವರಿ ಅಗಲದ ಟೈರ್‌ಗಳಿಂದ ವಿವಿಧ ಭೂಪ್ರದೇಶಗಳಲ್ಲಿ ಸ್ಥಿರತೆ ಹಾಗೂ ಸುಲಭ ಚಲನೆಗೆ ಅನುಕೂಲವಾಗಲಿದೆ.

ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಮರಗಳ ನಿರ್ವಹಣೆ, ಬೀದಿ ದೀಪಗಳ ನಿರ್ವಹಣೆ, ನಗರ ಸ್ವಚ್ಛತೆ ಸೇರಿದಂತೆ ವಿವಿಧ ಎತ್ತರದ ಕಾಮಗಾರಿಗಳಿಗೆ ಇಂತಹ ಆಧುನಿಕ ಯಂತ್ರೋಪಕರಣಗಳನ್ನು ಬಳಸುವುದರಿಂದ ಮಾನವಶ್ರಮ, ಸಮಯ ಹಾಗೂ ಕಾರ್ಯಾಚರಣೆಯ ವೆಚ್ಚವನ್ನು ಕಡಿಮೆ ಮಾಡುವುದರ ಜೊತೆಗೆ ಸಿಬ್ಬಂದಿಯ ಸುರಕ್ಷತೆಯನ್ನು ಹೆಚ್ಚಿಸಲು ಸಹಕಾರಿಯಾಗಲಿದೆ ಎಂದು ಅಧಿಕಾರಿಗಳು ಅಭಿಪ್ರಾಯಪಟ್ಟರು.

ಪ್ರಾತ್ಯಕ್ಷಿಕೆ ವೇಳೆ ಯಂತ್ರದ ವಿವಿಧ ಕಾರ್ಯವೈಖರಿಗಳನ್ನು ಪ್ರದರ್ಶಿಸಿ, ಮಹಾನಗರ ಪಾಲಿಕೆಯ ವಿವಿಧ ವಿಭಾಗಗಳ ಕಾರ್ಯಗಳಿಗೆ ಅದರ ಬಳಕೆ ಹೇಗೆ ಸಹಕಾರಿಯಾಗಲಿದೆ ಎಂಬುದರ ಕುರಿತು ಮಾಹಿತಿ ನೀಡಲಾಯಿತು.